ฯ นโม ตสฺส ภควโต อรหโต สมฺมาสมฺพุทฺธสฺสฯ
สทฺทนีติปฺปกรณํ (ปทมาลา)
คนฺถารมฺภกถา
ธีเรหิ มคฺคนาเยน, เยน พุทฺเธน เทสิตํ;
สิตํ ธมฺมมิธญฺญาย, ญายเต อมตํ ปทํฯ
ตํ นมิตฺวา มหาวีรํ, สพฺพญฺญุํ โลกนายกํ;
มหาการุณิกํ เสฎฺฐํ, วิสุทฺธํ สุทฺธิทายกํฯ
สทฺธมฺมญฺจสฺส ปูเชตฺวา, สุทฺธํ สนฺตมสงฺขตํ;
อตกฺกาวจรํ สุฎฺฐุ, วิภตฺตํ มธุรํ สิวํฯ
สงฺฆสฺส จ’ญฺชลึ กตฺวา, ปุญฺญกฺเขตฺตสฺส ตาทิโน;
สีลสมาธิปญฺญาทิ-วิสุทฺธคุณโชติโนฯ
นมสฺสนาทิปุญฺญสฺส, กตสฺส รตนตฺตเย;
เตชสาหํ ปหนฺตฺวาน, อนฺตราเย อเสสโตฯ
โลกนีติวิยตฺตสฺส, สตฺถุ สทฺธมฺมนีติโน;
สาสนตฺถํ ปวกฺขามิ, สทฺทนีติมนากุลํฯ
อาสวกฺขยลาเภน, โหติ สาสนสมฺปทา;
อาสวกฺขยลาโภจ, สจฺจาธิคมเหตุโกฯ
สจฺจาธิคมนํ ตญฺจ, ปฎิปตฺติสฺสิตํ มตํ;
ปฎิปตฺติ จ สา กามํ, ปริยตฺติปรายณาฯ
