ธมฺมปทคาถา (๒๑) ปกิณฺณกวคฺโค

     ธมฺมปทคาถาย เอกวีสติโม ปกิณฺณกวคฺโค

๒๙๐. มตฺตาสุขปริจฺจาคา, ปสฺเส เจ วิปุลํ สุขํ;

      จเช มตฺตาสุขํ ธีโร, สมฺปสฺสํ วิปุลํ สุขํฯ

๒๙๑. ปรทุกฺขูปธาเนน, อตฺตโน สุขมิจฺฉติ;

       เวรสํสคฺคสํสฏฺโฐ, เวรา โส น ปริมุจฺจติฯ

๒๙๒. ยญฺหิ กิจฺจํ ตทปวิทฺธํ, อกิจฺจํ ปน กรียติ;

       อุนฺนฬานํ ปมตฺตานํ, เตสํ วฑฺฒนฺติ อาสวาฯ

๒๙๓. เยสญฺจ สุสมารทฺธา, นิจฺจํ กายคตา สติ;

       อกิจฺจนฺเต น เสวนฺติ, กิจฺเจ สาตจฺจการิโน;

       สตานํ สมฺปชานานํ, อตฺถํ คจฺฉนฺติ อาสวาฯ

๒๙๔. มาตรํ ปิตรํ หนฺตฺวา, ราชาโน เทฺว จ ขตฺติเย;

       รฏฺฐํ สานุจรํ หนฺตฺวา, อนีโฆ ยาติ พฺราหฺมโณฯ

๒๙๕. มาตรํ ปิตรํ หนฺตฺวา, ราชาโน เทฺว จ โสตฺถิเย;

       เวยฺยคฺฆปญฺจมํ หนฺตฺวา, อนีโฆ ยาติ พฺราหฺมโณฯ

๒๙๖. สุปฺปพุทฺธํ ปพุชฺฌนฺติ, สทา โคตมสาวกา;

       เยสํ ทิวา จ รตฺโต จ, นิจฺจํ พุทฺธคตา สติฯ

๒๙๗. สุปฺปพุทฺธํ ปพุชฺฌนฺติ, สทา โคตมสาวกา;

       เยสํ ทิวา จ รตฺโต จ, นิจฺจํ ธมฺมคตา สติฯ

๒๙๘. สุปฺปพุทฺธํ ปพุชฺฌนฺติ, สทา โคตมสาวกา;

       เยสํ ทิวา จ รตฺโต จ, นิจฺจํ สงฺฆคตา สติฯ

๒๙๙. สุปฺปพุทฺธํ ปพุชฺฌนฺติ, สทา โคตมสาวกา;

       เยสํ ทิวา จ รตฺโต จ, นิจฺจํ กายคตา สติฯ

๓๐๐. สุปฺปพุทฺธํ ปพุชฺฌนฺติ, สทา โคตมสาวกา;

      เยสํ ทิวา จ รตฺโต จ, อหึสาย รโต มโนฯ

๓๐๑. สุปฺปพุทฺธํ ปพุชฺฌนฺติ, สทา โคตมสาวกา;

      เยสํ ทิวา จ รตฺโต จ, ภาวนาย รโต มโนฯ

๓๐๒. ทุปฺปพฺพชฺชํ ทุรภิรมํ, ทุราวาสา ฆรา ทุกฺขา;

       ทุกฺโขสมานสํวาโส, ทุกฺขานุปติตทฺธคู;

       ตสฺมา น จทฺธคู สิยา, น จ ทุกฺขานุปติโต สิยาฯ

๓๐๓. สทฺโธ สีเลน สมฺปนฺโน, ยโสโภคสมปฺปิโต;

       ยํ ยํ ปเทสํ ภชติ, ตตฺถ ตตฺเถว ปูชิโตฯ

๓๐๔. ทูเร สนฺโต ปกาเสนฺติ, หิมวนฺโตว ปพฺพโต;

       อสนฺเตตฺถ น ทิสฺสนฺติ, รตฺติขิตฺตา ยถา สราฯ

๓๐๕. เอกาสนํ เอกเสยฺยํ, เอโก จรมตนฺทิโต;

       เอโก ทมยมตฺตานํ, วนนฺเต รมิโต สิยาฯ

       ปกิณฺณกวคฺโค เอกวีสติโม นิฏฺฐิโตฯ

CR: http://www.bantamboon.com/