ธมฺมปทคาถา (๑๕) สุขวคฺโค

      ธมฺมปทคาถาย ปณฺณรสโม สุขวคฺโค

๑๙๗. สุสุขํ วต ชีวาม, เวริเนสุ อเวริโน;

       เวริเนสุ มนุสฺเสสุ, วิหราม อเวริโนฯ

๑๙๘. สุสุขํ วต ชีวาม, อาตุเรสุ อนาตุรา;

       อาตุเรสุ มนุสฺเสสุ, วิหราม อนาตุราฯ

๑๙๙. สุสุขํ วต ชีวาม, อุสฺสุเกสุ อนุสฺสุกา;

      อุสฺสุเกสุ มนุสฺเสสุ, วิหราม อนุสฺสุกาฯ

๒๐๐. สุสุขํ วต ชีวาม, เยสํ โน นตฺถิ กิญฺจนํ;

      ปีติภกฺขา ภวิสฺสาม, เทวา อาภสฺสรา ยถาฯ

๒๐๑. ชยํ เวรํ ปสวติ, ทุกฺขํ เสติ ปราชิโต;

      อุปสนฺโต สุขํ เสติ, หิตฺวา ชยปราชยํฯ

๒๐๒. นตฺถิ ราคสโม อคฺคิ, นตฺถิ โทสสโม กลิ;

       นตฺถิ ขนฺธสมา ทุกฺขา, นตฺถิ สนฺติปรํ สุขํฯ

๒๐๓. ชิฆจฺฉา ปรมา โรคา, สงฺขารา ปรมา ทุกฺขา;

       เอตํ ญตฺวา ยถาภูตํ, นิพฺพานํ ปรมํ สุขํฯ

๒๐๔. อาโรคฺยปรมา ลาภา, สนฺตุฏฺฐีปรมํ ธนํ;

      วิสฺสาสปรมา ญาติ, นิพฺพานํ ปรมํ สุขํฯ

๒๐๕. ปวิเวกรสํ ปิตฺวา, รสํ อุปสมสฺส จ;

      นิทฺทโร โหติ นิปฺปาโป, ธมฺมปีติรสํ ปิวํฯ

๒๐๖. สาหุ ทสฺสนมริยานํ, สนฺนิวาโส สทา สุโข;

      อทสฺสเนน พาลานํ, นิจฺจเมว สุขี สิยาฯ

๒๐๗. พาลสงฺคตจารี หิ, ทีฆมทฺธาน โสจติ;

      ทุกฺโข พาเลหิ สํวาโส, อมิตฺเตเนว สพฺพทา;

      ธีโร จ สุขสํวาโส, ญาตีนํว สมาคโมฯ

๒๐๘. ตสฺมา หิ-

      ธีรญฺจ ปญฺญญฺจ พหุสฺสุตญฺจ, โธรยฺหสีลํ วตวนฺตมริยํ;

      ตํ ตาทิสํ สปฺปุริสํ สุเมธํ, ภเชถ นกฺขตฺตปถํว จนฺทิมาฯ

     สุขวคฺโค ปณฺณรสโม นิฏฺฐิโตฯ