ธมฺมปทคาถา (๑๐) ทณฺฑวคฺโค

     ธมฺมปทคาถาย ทสโม ทณฺฑวคฺโค

๑๒๙. สพฺเพ ตสนฺติ ทณฺฑสฺส, สพฺเพ ภายนฺติ มจฺจุโน;

       อตฺตานํ อุปมํ กตฺวา, น หเนยฺย น ฆาตเยฯ

๑๓๐. สพฺเพ ตสนฺติ ทณฺฑสฺส, สพฺเพสํ ชีวิตํ ปิยํ;

       อตฺตานํ อุปมํ กตฺวา, น หเนยฺย น ฆาตเยฯ

๑๓๑. สุขกามานิ ภูตานิ, โย ทณฺเฑน วิหึสติ;

       อตฺตโน สุขเมสาโน, เปจฺจ โส น ลภเต สุขํฯ

๑๓๒. สุขกามานิ ภูตานิ, โย ทณฺเฑน น หึสติ;

       อตฺตโน สุขเมสาโน, เปจฺจ โส ลภเต สุขํฯ

๑๓๓. มาโวจ ผรุสํ กญฺจิ, วุตฺตา ปฏิวเทยฺยุ ตํ;

       ทุกฺขา หิ สารมฺภกถา, ปฏิทณฺฑา ผุเสยฺยุ ตํฯ

๑๓๔. สเจ เนเรสิ อตฺตานํ, กํโส อุปหโต ยถา;

       เอส ปตฺโตสิ นิพฺพานํ, สารมฺโภ เต น วิชฺชติฯ

๑๓๕. ยถา ทณฺเฑน โคปาโล, คาโว ปาเชติ โคจรํ;

       เอวํ ชรา จ มจฺจุ จ, อายุํ ปาเชนฺติ ปาณินํฯ

๑๓๖. อถ ปาปานิ กมฺมานิ, กรํ พาโล น พุชฺฌติ;

      เสหิ กมฺเมหิ ทุมฺเมโธ, อคฺคิทฑฺโฒว ตปฺปติฯ

๑๓๗. โย ทณฺเฑน อทณฺเฑสุ, อปฺปทุฏฺเฐสุ ทุสฺสติ;

       ทสนฺนมญฺญตรํ ฐานํ, ขิปฺปเมว นิคจฺฉติฯ

๑๓๘. เวทนํ ผรุสํ ชานึ, สรีรสฺส จ เภทนํ;

       ครุกํ วาปิ อาพาธํ, จิตฺตกฺเขปํ ว ปาปุเณฯ

๑๓๙. ราชโต วา อุปสคฺคํ, อพฺภกฺขานํ ว ทารุณํ;

       ปริกฺขยํ ว ญาตีนํ, โภคานํ ว ปภงฺคุณํฯ

๑๔๐. อถ วาสฺส อคารานิ, อคฺคิ ฑหติ ปาวโก;

      กายสฺส เภทา ทุปฺปญฺโญ, นิรยํ โส อุปปชฺชติฯ

๑๔๑. น นคฺคจริยา น ชฏา น ปงฺกา, นานาสกา ตณฺฑิลสายิกา วา;

      รโชชลฺลํ อุกฺกุฏิกปฺปธานํ, โสเธนฺติ มจฺจํ อวิติณฺณกงฺขํฯ

๑๔๒. อลงฺกโต เจปิ สมํ จเรยฺย, สนฺโต ทนฺโต นิยโต พฺรหฺมจารี;

       สพฺเพสุ ภูเตสุ นิธาย ทณฺฑํ, โส พฺราหฺมโณ โส สมโณ ส ภิกฺขุฯ

๑๔๓. หิรินิเสโธ ปุริโส, โกจิ โลกสฺมิ วิชฺชติ;

      โย นิทฺทํ อปโพเธติ, อสฺโส ภทฺโร กสามิวฯ

๑๔๔. อสฺโส ยถา ภทฺโร กสานิวิฏฺโฐ, อาตาปิโน สํเวคิโน ภวาถ;

      สทฺธาย สีเลน จ วิริเยน จ, สมาธินา ธมฺมวินิจฺฉเยน จ;

      สมฺปนฺนวิชฺชาจรณา ปติสฺสตา, ปหสฺสถ ทุกฺขมิทํ อนปฺปกํฯ

๑๔๕. อุทกํ หิ นยนฺติ เนตฺติกา, อุสุการา นมยนฺติ เตชนํ;

      ทารุํ นมยนฺติ ตจฺฉกา, อตฺตานํ ทมยนฺติ สุพฺพตาฯ

      ทณฺฑวคฺโค ทสโม นิฏฺฐิโตฯ