ธมฺมปทคาถา (๑๒) อตฺตวคฺโค

     ธมฺมปทคาถาย ทฺวาทสโม อตฺตวคฺโค

๑๕๗. อตฺตานญฺเจ ปิยํ ชญฺญา, รกฺเขยฺย นํ สุรกฺขิตํ;

      ติณฺณํ อญฺญตรํ ยามํ, ปฏิชคฺเคยฺย ปณฺฑิโตฯ

๑๕๘. อตฺตานเมว ปฐมํ, ปฏิรูเป นิเวสเย;

      อถญฺญมนุสาเสยฺย, น กิลิสฺเสยฺย ปณฺฑิโตฯ

๑๕๙. อตฺตานญฺเจ ตถา กยิรา, ยถญฺญมนุสาสติ;

      สุทนฺโต วต ทเมถ, อตฺตา หิ กิร ทุทฺทโมฯ

๑๖๐. อตฺตา หิ อตฺตโน นาโถ, โก หิ นาโถ ปโร สิยา;

      อตฺตนา หิ สุทนฺเตน, นาถํ ลภติ ทุลฺลภํฯ

๑๖๑. อตฺตนา ว กตํ ปาปํ, อตฺตชํ อตฺตสมฺภวํ;

      อภิมตฺถติ ทุมฺเมธํ, วชิรํวมฺหยํ มณึฯ

๑๖๒. ยสฺส อจฺจนฺตทุสฺสีลฺยํ, มาลุวา สาลมิโวตฺถตํ;

      กโรติ โส ตถตฺตานํ, ยถา นํ อิจฺฉตี ทิโสฯ

๑๖๓. สุกรานิ อสาธูนิ, อตฺตโน อหิตานิ จ;

      ยํ เว หิตญฺจ สาธุญฺจ, ตํ เว ปรมทุกฺกรํฯ

๑๖๔. โย สาสนํ อรหตํ, อริยานํ ธมฺมชีวินํ;

      ปฏิกฺโกสติ ทุมฺเมโธ, ทิฏฺฐึ นิสฺสาย ปาปิกํ

      ผลานิ กณฺฏกสฺเสว, อตฺตฆาตาย ผลฺลติฯ

๑๖๕. อตฺตนา หิ กตํ ปาปํ, อตฺตนา สงฺกิลิสฺสติ;

      อตฺตนา อกตํ ปาปํ, อตฺตนา ว วิสุชฺฌติ,

      สุทฺธิ อสุทฺธิ ปจฺจตฺตํ, นาญฺโญ อญฺญํ วิโสธเยฯ

๑๖๖. อตฺตทตฺถํ ปรตฺเถน, พหุนาปิ น หาปเย;

      อตฺตทตฺถมภิญฺญาย, สทตฺถปสุโต สิยาฯ

     อตฺตวคฺโค ทฺวาทสโม นิฏฺฐิโตฯ

CR: https://lovelyceelek.files.wordpress.com/