ธมฺมปทคาถา (๖) ปณฺฑิตวคฺโค

      ธมฺมปทคาถาย ฉฏฺโฐ ปณฺฑิตวคฺโค

๗๖. นิธีนํว ปวตฺตารํ, ยํ ปสฺเส วชฺชทสฺสินํ;

     นิคฺคยฺหวาทึ เมธาวึ, ตาทิสํ ปณฺฑิตํ ภเช;

     ตาทิสํ ภชมานสฺส, เสยฺโย โหติ น ปาปิโยฯ

๗๗. โอวเทยฺยานุสาเสยฺย, อสพฺภา จ นิวารเย;

      สตํ หิ โส ปิโย โหติ, อสตํ โหติ อปฺปิโยฯ

๗๘. น ภเช ปาปเก มิตฺเต, น ภเช ปุริสาธเม;

     ภเชถ มิตฺเต กลฺยาเณ, ภเชถ ปุริสุตฺตเมฯ

๗๙. ธมฺมปีติ สุขํ เสติ, วิปฺปสนฺเนน เจตสา;

     อริยปฺปเวทิเต ธมฺเม, สทา รมติ ปณฺฑิโตฯ

๘๐. อุทกญฺหิ นยนฺติ เนตฺติกา, อุสุการา นมยนฺติ เตชนํ;

     ทารุํ นมยนฺติ ตจฺฉกา, อตฺตานํ ทมยนฺติ ปณฺฑิตาฯ

๘๑. เสโล ยถา เอกฆโน, วาเตน น สมีรติ;

     เอวํ นินฺทาปสํสาสุ, น สมิญฺชนฺติ ปณฺฑิตาฯ

๘๒. ยถาปิ รหโท คมฺภีโร, วิปฺปสนฺโน อนาวิโล;

     เอวํ ธมฺมานิ สุตฺวาน, วิปฺปสีทนฺติ ปณฺฑิตาฯ

๘๓. สพฺพตฺถ เว สปฺปุริสา จชนฺติ, น กามกามา ลปยนฺติ สนฺโต;

     สุเขน ผุฏฺฐา อถวา ทุกฺเขน, น อุจฺจาวจํ ปณฺฑิตา ทสฺสยนฺติฯ

๘๔. น อตฺตเหตุ น ปรสฺส เหตุ, น ปุตฺตมิจฺเฉ น ธนํ น รฏฺฐํ;

     น อิจฺเฉยฺย อธมฺเมน สมิทฺธิมตฺตโน, ส สีลวา ปญฺญวา ธมฺมิโก สิยาฯ

๘๕. อปฺปกา เต มนุสฺเสสุ, เย ชนา ปารคามิโน;

     อถายํ อิตรา ปชา, ตีรเมวานุธาวติฯ

๘๖. เย จ โข สมฺมทกฺขาเต, ธมฺเม ธมฺมานุวตฺติโน;

     เต ชนา ปารเมสฺสนฺติ, มจฺจุเธยฺยํ สุทุตฺตรํฯ

๘๗. กณฺหํ ธมฺมํ วิปฺปหาย, สุกฺกํ ภาเวถ ปณฺฑิโต;

     โอกา อโนกมาคมฺม, วิเวเก ยตฺถ ทูรมํฯ

๘๘. ตตฺราภิรติมิจฺเฉยฺย, หิตฺวา กาเม อกิญฺจโน;

     ปริโยทเปยฺย อตฺตานํ, จิตฺตเกฺลเสหิ ปณฺฑิโตฯ

๘๙. เยสํ สมฺโพธิยงฺเคสุ, สมฺมา จิตฺตํ สุภาวิตํ;

     อาทานปฏินิสฺสคฺเค, อนุปาทาย เย รตา;

     ขีณาสวา ชุติมนฺโต, เต โลเก ปรินิพฺพุตาฯ

     ปณฺฑิตวคฺโค ฉฏฺโฐ นิฏฺฐิโตฯ

CR: http://mypicturegallery.net/