ธมฺมปทคาถา (๕) พาลวคฺโค

ธมฺมปทคาถาย ปญฺจวคฺโค พาลวคฺโค

๖๐. ทีฆา ชาครโต รตฺติ, ทีฆํ สนฺตสฺส โยชนํ;

     ทีโฆ พาลาน สํสาโร, สทฺธมฺมํ อวิชานตํฯ

๖๑. จรญฺเจ นาธิคจฺเฉยฺย, เสยฺยํ สทิสมตฺตโน;

     เอกจริยํ ทฬฺหํ กยิรา, นตฺถิ พาเล สหายตาฯ

๖๒. ปุตฺตา มตฺถิ ธนมตฺถิ, อิติ พาโล วิหญฺญติ;

     อตฺตา หิ อตฺตโน นตฺถิ, กุโต ปุตฺตา กุโต ธนํฯ

๖๓. โย พาโล มญฺญตี พาลฺยํ, ปณฺฑิโต วาปิ เตน โส;

     พาโล จ ปณฺฑิตมานี, ส เว พาโลติ วุจฺจติฯ

๖๔. ยาวชีวมฺปิ เจ พาโล, ปณฺฑิตํ ปยิรุปาสติ;

     น โส ธมฺมํ วิชานาติ, ทพฺพี สูปรสํ ยถาฯ

๖๕. มุหุตฺตมปิ เจ วิญฺญู, ปณฺฑิตํ ปยิรุปาสติ;

     ขิปฺปํ ธมฺมํ วิชานาติ, ชิวฺหา สูปรสํ ยถาฯ

๖๖. จรนฺติ พาลา ทุมฺเมธา, อมิตฺเตเนว อตฺตนา;

     กโรนฺตา ปาปกํ กมฺมํ, ยํ โหติ กฏุกปฺผลํฯ

๖๗. น ตํ กมฺมํ กตํ สาธุ, ยํ กตฺวา อนุตปฺปติ;

     ยสฺส อสฺสุมุโข โรทํ, วิปากํ ปฏิเสวติฯ

๖๘. ตญฺจ กมฺมํ กตํ สาธุ, ยํ กตฺวา นานุตปฺปติ;

     ยสฺส ปตีโต สุมโน, วิปากํ ปฏิเสวติฯ

๖๙. มธุวา มญฺญตี พาโล, ยาว ปาปํ น ปจฺจติ;

     ยทา จ ปจฺจติ ปาปํ, อถ (พาโล) ทุกฺขํ นิคจฺฉติฯ

๗๐. มาเส มาเส กุสคฺเคน, พาโล ภุญฺเชถ โภชนํ;

     น โส สงฺขาตธมฺมานํ, กลํ อคฺฆติ โสฬสึฯ

๗๑. น หิ ปาปํ กตํ กมฺมํ, สชฺชุขีรํว มุจฺจติ;

     ฑหนฺตํ พาลมเนฺวติ, ภสฺมาจฺฉนฺโนว ปาวโกฯ

๗๒. ยาวเทว อนตฺถาย, ญตฺตํ พาลสฺส ชายติ;

     หนฺติ พาลสฺส สุกฺกํสํ, มุทฺธํ อสฺส วิปาตยํฯ

๗๓. อสนฺตํ ภาวนมิจฺเฉยฺย, ปุเรกฺขารญฺจ ภิกฺขุสุ;

     อาวาเสสุ จ อิสฺสริยํ, ปูชา ปรกุเลสุ จฯ

๗๔. มเมว กตมญฺญนฺตุ, คิหี ปพฺพชิตา อุโภ;

     มเมว อติวสา อสฺสุ, กิจฺจากิจฺเจสุ กิสฺมิจิ;

     อิติ พาลสฺส สงฺกปฺโป, อิสฺสา มาโน จ วฑฺฒติฯ

๗๕. อญฺญา หิ ลาภูปนิสา, อญฺญา นิพฺพานคามินี;

     เอวเมตํ อภิญฺญาย, ภิกฺขุ พุทฺธสฺส สาวโก;

     สกฺการํ นาภินนฺเทยฺย, วิเวกมนุพฺรูหเยฯ

      พาลวคฺโค ปญฺจโมฯ

CR: http://mypicturegallery.net/