ธมฺมปทคาถา (๔) ปุปฺผวคฺโค

      ธมฺมปทคาถาย จตุตฺโถ ปุปฺผวคฺโค

๔๔. โก อิมํ ปฐวึ วิเชสฺสติ, ยมโลกญฺจ อิมํ สเทวกํ;

      โก ธมฺมปทํ สุเทสิตํ, กุสโล ปุปฺผมิว ปเจสฺสติฯ

๔๕. เสโข ปฐวึ วิเชสฺสติ, ยมโลกญฺจ อิมํ สเทวกํ;

      เสโข ธมฺมปทํ สุเทสิตํ, กุสโล ปุปฺผมิว ปเจสฺสติฯ

๔๖. เผณูปมํ กายมิมํ วิทิตฺวา,

      มรีจิธมฺมํ อภิสมฺพุธาโน;

      เฉตฺวาน มารสฺส ปปุปฺผกานิ,

      อทสฺสนํ มจฺจุราชสฺส คจฺเฉฯ

๔๗. ปุปฺผานิ เหว ปจินนฺตํ, พฺยาสตฺตมนสํ นรํ;

      สุตฺตํ คามํ มโหโฆว, มจฺจุ อาทาย คจฺฉติฯ

๔๘. ปุปฺผานิ เหว ปจินนฺตํ, พฺยาสตฺตมนสํ นรํ;

      อติตฺตํเยว กาเมสุ, อนฺตโก กุรุเต วสํฯ

๔๙. ยถาปิ ภมโร ปุปฺผํ, วณฺณคนฺธํ อเหฐยํ;

      ปเลติ รสมาทาย, เอวํ คาเม มุนี จเรฯ

๕๐. น ปเรสํ วิโลมานิ, น ปเรสํ กตากตํ;

      อตฺตโน ว อเวกฺเขยฺย, กตานิ อกตานิ จฯ

๕๑. ยถาปิ รุจิรํ ปุปฺผํ, วณฺณวนฺตํ อคนฺธกํ;

      เอวํ สุภาสิตา วาจา, อผลา โหติ อกุพฺพโตฯ

๕๒. ยถาปิ รุจิรํ ปุปฺผํ, วณฺณวนฺตํ สุคนฺธกํ;

       เอวํ สุภาสิตา วาจา, สผลา โหติ สุกุพฺพโตฯ

๕๓. ยถาปิ ปุปฺผราสิมฺหา, กยิรา มาลาคุเณ พหู;

       เอวํ ชาเตน มจฺเจน, กตฺตพฺพํ กุสลํ พหุํฯ

๕๔. น ปุปฺผคนฺโธ ปฏิวาตเมติ,

        น จนฺทนํ ตครมลฺลิกา วา;

       สตญฺจ คนฺโธ ปฏิวาตเมติ,

       สพฺพา ทิสา สปฺปุริโส ปวายติฯ

๕๕. จนฺทนํ ตครํ วาปิ, อุปฺปลํ อถ วสฺสิกี;

      เอเตสํ คนฺธชาตานํ, สีลคนฺโธ อนุตฺตโรฯ

๕๖. อปฺปมตฺโต อยํ คนฺโธ, ยฺวายํ ตครจนฺทนี;

      โย จ สีลวตํ คนฺโธ, วาติ เทเวสุ อุตฺตโมฯ

๕๗. เตสํ สมฺปนฺนสีลานํ, อปฺปมาทวิหารินํ;

       สมฺมทญฺญา วิมุตฺตานํ, มาโร มคฺคํ น วินฺทติฯ

๕๘. ยถา สงฺการธานสฺมึ, อุชฺฌิตสฺมึ มหาปเถ;

      ปทุมํ ตตฺถ ชาเยถ, สุจิคนฺธํ มโนรมํฯ

๕๙. เอวํ สงฺการภูเตสุ, อนฺธภูเต ปุถุชฺชเน;

       อติโรจติ ปญฺญาย, สมฺมาสมฺพุทฺธสาวโกฯ

       ปุปฺผวคฺโค จตุตฺโถฯ

 

 CR: http://mypicturegallery.net/