ธมฺมปทคาถา (๓) จิตฺตวคฺโค

ธมฺมปทคาถาย ตติโย จิตฺตวคฺโค

๓๓. ผนฺทนํ จปลํ จิตฺตํ, ทุรกฺขํ ทุนฺนิวารยํ;

      อุชุํ กโรติ เมธาวี, อุสุกาโรว เตชนํฯ

๓๔. วาริโชว ถเล ขิตฺโต, โอกโมกตอุพฺภโต;

       ปริผนฺทติทํ จิตฺตํ มารเธยฺยํ ปหาตเวฯ

๓๕. ทุนฺนิคฺคหสฺส ลหุโน, ยตฺถ กามนิปาติโน;

       จิตฺตสฺส ทมโถ สาธุ, จิตฺตํ ทนฺตํ สุขาวหํฯ

๓๖. สุทุทฺทสํ สุนิปุณํ, ยตฺถ กามนิปาตินํ;

       จิตฺตํ รกฺเขถ เมธาวี, จิตฺตํ คุตฺตํ สุขาวหํฯ

๓๗. ทูรงฺคมํ เอกจรํ, อสรีรํ คุหาสยํ;

       เย จิตฺตํ สญฺญเมสฺสนฺติ, โมกฺขนฺติ มารพนฺธนาฯ

๓๘. อนวฏฺฐิตจิตฺตสฺส, สทฺธมฺมํ อวิชานโต;

      ปริปฺลวปสาทสฺส, ปญฺญา น ปริปูรติฯ

๓๙. อนวสฺสุตจิตฺตสฺส, อนนฺวาหตเจตโส;

       ปุญฺญปาปปหีนสฺส, นตฺถิ ชาครโต ภยํฯ

๔๐. กุมฺภูปมํ กายมิทํ วิทิตฺวา,

      นครูปมํ จิตฺตมิทํ ถเกตฺวา;

     โยเธถ มารํ ปญฺญาวุเธน,

     ชิตญฺจ รกฺเข อนิเวสโน สิยาฯ

๔๑. อจิรํ วตยํ กาโย, ปฐวึ อธิเสสฺสติ;

      ฉุทฺโธ อเปตวิญฺญาโณ, นิรตฺถํว กลิงฺครํฯ

๔๒. ทิโส ทิสํ ยนฺตํ กยิรา, เวรี วา ปน เวรินํ;

       มิจฺฉาปณิหิตํ จิตฺตํ, ปาปิโย นํ ตโต กเรฯ

๔๓. น ตํ มาตา ปิตา กยิรา, อญฺเญ วาปิ จ ญาตกา;

       สมฺมาปณิหิตํ จิตฺตํ, เสยฺยโส นํ ตโต กเรฯ

           จิตฺตวคฺโค ตติโยฯ