ธมฺมปทคาถา (๑๙) ธมฺมฏฺฐวคฺโค

     ธมฺมปทคาถาย เอกูนวีสติโม ธมฺมฏฺฐวคฺโค

๒๕๖. น เตน โหติ ธมฺมฏฺโฐ, เยนตฺถํ สหสา นเย;

     โย จ อตฺถํ อนตฺถญฺจ, อุโภ นิจฺเฉยฺย ปณฺฑิโตฯ

๒๕๗. อสาหเสน ธมฺเมน, สเมน นยตี ปเร;

       ธมฺมสฺส คุตฺโต เมธาวี, ธมฺมฏฺโฐติ ปวุจฺจติฯ

๒๕๘. น เตน ปณฺฑิโต โหติ, ยาวตา พหุ ภาสติ;

      เขมี อเวรี อภโย, ปณฺฑิโตติ ปวุจฺจติฯ

๒๕๙. น ตาวตา ธมฺมธโร, ยาวตา พหุ ภาสติ;

      โย จ อปฺปมฺปิ สุตฺวาน, ธมฺมํ กาเยน ปสฺสติ;

      ส เว ธมฺมธโร โหติ, โย ธมฺมํ นปฺปมชฺชติฯ

๒๖๐. น เตน เถโร โหติ, เยนสฺส ปลิตํสิโร;

      ปริปกฺโก วโย ตสฺส, โมฆชิณฺโณติ วุจฺจติฯ

๒๖๑. ยมฺหิ สจฺจญฺจ ธมฺโม จ, อหึสา สญฺญโม ทโม;

      ส เว วนฺตมโล ธีโร, โส เถโรติ ปวุจฺจติฯ

๒๖๒. น วากฺกรณมตฺเตน, วณฺณโปกฺขรตาย วา;

      สาธุรูโป นโร โหติ, อิสฺสุกี มจฺฉรี สโฐฯ

๒๖๓. ยสฺส เจตํ สมุจฺฉินฺนํ, มูลฆจฺจํ สมูหตํ;

      ส วนฺตโทโส เมธาวี, สาธุรูโปติ วุจฺจติฯ

๒๖๔. น มุณฺฑเกน สมโณ, อพฺพโต อลิกํ ภณํ;

      อิจฺฉาโลภสมาปนฺโน, สมโณ กึ ภวิสฺสติฯ

๒๖๕. โย จ สเมติ ปาปานิ, อณุํถูลานิ สพฺพโส;

       สมิตตฺตา หิ ปาปานํ, สมโณติ ปวุจฺจติฯ

๒๖๖. น เตน ภิกฺขุ โส โหติ, ยาวตา ภิกฺขเต ปเร;

      วิสฺสํ ธมฺมํ สมาทาย, ภิกฺขุ โหติ น ตาวตาฯ

๒๖๗. โยธ ปุญฺญญฺจ ปาปญฺจ, พาเหตฺวา พฺรหฺมจริยวา;

       สงฺขาย โลเก จรติ, ส เว ภิกฺขูติ วุจฺจติฯ

๒๖๘. น โมเนน มุนิ โหติ, มูฬฺหรูโป อวิทฺทสุ;

      โย จ ตุลํว ปคฺคยฺห, วรมาทาย ปณฺฑิโตฯ

๒๖๙. ปาปานิ ปริวชฺเชติ, ส มุนิ เตน โส มุนิ;

      โย มุนาติ อุโภ โลเก, มุนิ เตน ปวุจฺจติฯ

๒๗๐. น เตน อริโย โหติ, เยน ปาณานิ หึสติ;

      อหึสา สพฺพปาณานํ, อริโยติ ปวุจฺจติฯ

๒๗๑. น สีลพฺพตมตฺเตน, พาหุสจฺเจน วา ปน;

       อถวา สมาธิลาเภน, วิวิตฺตสยเนน วาฯ

๒๗๒. ผุสามิ เนกฺขมฺมสุขํ, อปุถุชฺชนเสวิตํ;

       ภิกฺขุ วิสฺสาสมาปาทิ, อปฺปตฺโต อาสวกฺขยํฯ

      ธมฺมฏฺฐวคฺโค เอกูนวีสติโม นิฏฺฐิโตฯ

CR: http://www.homedec.in.th/wp-content/