ธมฺมปทคาถา (๑๘) มลวคฺโค

     ธมฺมปทคาถาย อฏฺฐารสโม มลวคฺโค

๒๓๕. ปณฺฑุปลาโสวทานิสิ, ยมปุริสาปิ จ เต อุปฏฺฐิตา;

      อุยฺโยคมุเข จ ติฏฺฐสิ, ปาเถยฺยมฺปิ จ เต น วิชฺชติฯ

๒๓๖. โส กโรหิ ทีปมตฺตโน, ขิปฺปํ วายม ปณฺฑิโต ภว;

       นิทฺธนฺตมโล อนงฺคโณ, ทิพฺพํ อริยภูมึ อุเปหิสิฯ

๒๓๗. อุปนีตวโย ว ทานิสิ, สมฺปยาโตสิ ยมสฺส สนฺติกํ;

      วาโสปิ จ เต นตฺถิ อนฺตรา, ปาเถยฺยมฺปิ จ เต น วิชฺชติฯ

๒๓๘. โส กโรหิ ทีปมตฺตโน, ขิปฺปํ วายม ปณฺฑิโต ภว;

       นิทฺธนฺตมโล อนงฺคโณ, น ปุน ชาติชรํ อุเปหิสิฯ

๒๓๙. อนุปุพฺเพน เมธาวี, โถกํ โถกํ ขเณ ขเณ;

      กมฺมาโร รชตสฺเสว, นิทฺธเม มลมตฺตโนฯ

๒๔๐. อยสา ว มลํ สมุฏฺฐิตํ, ตทุฏฺฐาย ตเมว ขาทติ;

      เอวํ อติโธนจารินํ, สานิ กมฺมานิ นยนฺติ ทุคฺคตึฯ

๒๔๑. อสชฺฌายมลา มนฺตา, อนุฏฺฐานมลา ฆรา;

      มลํ วณฺณสฺส โกสชฺชํ, ปมาโท รกฺขโต มลํฯ

๒๔๒. มลิตฺถิยา ทุจฺจริตํ, มจฺเฉรํ ททโต มลํ;

      มลา เว ปาปกา ธมฺมา, อสฺมึ โลเก ปรมฺหิ จฯ

๒๔๓. ตโต มลา มลตรํ, อวิชฺชา ปรมํ มลํ;

      เอตํ มลํ ปหตฺวาน, นิมฺมลา โหถ ภิกฺขโวฯ

๒๔๔. สุชีวํ อหิริเกน, กากสูเรน ธํสินา;

      ปกฺขนฺทินา ปคพฺเภน, สงฺกิลิฏฺเฐน ชีวิตํฯ

๒๔๕. หิรีมตา จ ทุชฺชีวํ, นิจฺจํ สุจิคเวสินา;

      อลีเนนาปคพฺเภน, สุทฺธาชีเวน ปสฺสตาฯ

๒๔๖. โย ปาณมติมาเปติ, มุสาวาทญฺจ ภาสติ;

      โลเก อทินฺนํ อาทิยติ, ปรทารญฺจ คจฺฉติฯ

๒๔๗. สุราเมรยปานญฺจ, โย นโร อนุยุญฺชติ;

       อิเธวเมโส โลกสฺมึ, มูลํ ขนติ อตฺตโนฯ

๒๔๘. เอวํ โภ ปุริส ชานาหิ, ปาปธมฺมา อสญฺญตา;

      มา ตํ โลโภ อธมฺโม จ, จิรํ ทุกฺขาย รนฺธยุํฯ

๒๔๙. ททาติ เว ยถาสทฺธํ, ยถาปสาทนํ ชโน;

      ตตฺถ โย มงฺกุโต โหติ, ปเรสํ ปานโภชเน;

      น โส ทิวา วา รตฺตึ วา, สมาธึ อธิคจฺฉติฯ

๒๕๐. ยสฺสเจตํ สมุจฺฉินฺนํ, มูลฆจฺฉํ สมูหตํ;

      ส เว ทิวา วา รตฺตึ วา, สมาธึ อธิคจฺฉติฯ

๒๕๑. นตฺถิ ราคสโม อคฺคิ, นตฺถิ โทสสโม คโห;

      นตฺถิ โมหสมํ ชาลํ, นตฺถิ ตณฺหาสมา นทีฯ

๒๕๒. สุทสฺสํ วชฺชมญฺเญสํ, อตฺตโน ปน ทุทฺทสํ;

      ปเรสํ หิ โส วชฺชานิ, โอปุนาติ ยถา ภุสํ;

      อตฺตโน ปน ฉาเทติ, กลึว กิตวา สโฐฯ

๒๕๓. ปรวชฺชานุปสฺสิสฺส, นิจฺจํ อุชฺฌานสญฺญิโน;

      อาสวา ตสฺส วฑฺฒนฺติ, อารา โส อาสวกฺขยาฯ

๒๕๔. อากาเสว ปทํ นตฺถิ, สมโณ นตฺถิ พาหิเร;

      ปปญฺจาภิรตา ปชา, นิปฺปปญฺจา ตถาคตาฯ

๒๕๕. อากาเสว ปทํ นตฺถิ, สมโณ นตฺถิ พาหิเรฯ

      สงฺขารา สสฺสตา นตฺถิ, นตฺถิ พุทฺธานมิญฺชิตํฯ

      มลวคฺโค อฏฺฐารสโม นิฏฺฐิโตฯ

CR: http://acne.wq45.com/