ธมฺมปทคาถา (๒๔) ตณฺหาวคฺโค

      ธมฺมปทคาถาย จตุวีสติโม ตณฺหาวคฺโค

๓๓๔. มนุชสฺส ปมตฺตจาริโน, ตณฺหา วฑฺฒติ มาลุวา วิย;

      โส ปลวตี หุราหุรํ, ผลมิจฺฉํว วนสฺมึ วานโรฯ

๓๓๕. ยํ เอสา สหตี ชมฺมี, ตณฺหา โลเก วิสตฺติกา;

      โสกา ตสฺส ปวฑฺฒนฺติ, อภิวฑฺฒํว พีรณํฯ

๓๓๖. โย เจ ตํ สหตี ชมฺมึ, ตณฺหํ โลเก ทุรจฺจยํ;

      โสกา ตมฺหา ปปตนฺติ, อุทพินฺทุว โปกฺขราฯ

๓๓๗. ตํ โว วทามิ ภทฺทํ โว, ยาวนฺเตตฺถ สมาคตา;

       ตณฺหาย มูลํ ขณถ, อุสีรตฺโถว พีรณํ;

       มา โว นฬํว โสโตว, มาโร ภญฺชิ ปุนปฺปุนํฯ

๓๓๘. ยถาปิ มูเล อนุปทฺทเว ทฬฺเห, ฉินฺโนปิ รุกฺโข ปุนเรว รูหติ;

       เอวมฺปิ ตณฺหานุสเย อนูหเต, นิพฺพตฺตติ ทุกฺขมิทํ ปุนปฺปุนํฯ

๓๓๙. ยสฺส ฉตฺตึสตี โสตา, มนาปสฺสวนา ภุสา;

      วาหา วหนฺติ ทุทฺทิฏฺฐึ, สงฺกปฺปา ราคนิสฺสิตาฯ

๓๔๐. สวนฺติ สพฺพธี โสตา, ลตา อุพฺภิชฺช ติฏฺฐติ;

      ตญฺจ ทิสฺวา ลตํ ชาตํ, มูลํ ปญฺญาย ฉินฺทถฯ

๓๔๑. สริตานิ สิเนหิตานิ จ, โสมนสฺสานิ ภวนฺติ ชนฺตุโน;

      เต สาตสิตา สุเขสิโน, เต เว ชาติชรูปคา นราฯ

๓๔๒. ตสิณาย ปุรกฺขตา ปชา, ปริสปฺปนฺติ สโสว พนฺธิโต;

       สญฺโญชนสงฺคสตฺตกา, ทุกฺขมุเปนฺติ ปุนปฺปุนํ จิรายฯ

๓๔๓. ตสิณาย ปุรกฺขตา ปชา, ปริสปฺปนฺติ สโสว พนุธิโต;

       ตสฺมา ตสิณํ วิโนทเย, ภิกฺขุ อากงฺขํ วิราคมตฺตโนฯ

๓๔๔. โย นิพฺพนโฐ วนาธิมุตฺโต, วนมุตฺโต วนเมว ธาวติ;

       ตํ ปุคฺคลเมว ปสฺสถ, มุตฺโต พนฺธนเมว ธาวติฯ

๓๔๕. น ตํ ทฬฺหํ พนฺธนมาหุ ธีรา, ยทายสํ ทารุชํ ปพฺพชญฺจ;

       สารตฺตรตฺตา มณิกุณฺฑเลสุ, ปุตฺเตสุ ทาเรสุ จ ยา อเปกฺขาฯ

๓๔๖. เอตํ ทฬฺหํ พนฺธนมาหุ ธีรา, โอหารินํ สิถิลํ ทุปฺปมุญฺจํ;

       เอตํปิ เฉตฺวาน ปริพฺพชนฺติ, อนเปกฺขิโน กามสุขํ ปหายฯ

๓๔๗. เย ราครตฺตานุปตนฺติ โสตํ, สยํ กตํ มกฺกฏโกว ชาลํ;

       เอตมฺปิ เฉตฺวาน วชนฺติ ธีรา, อนเปกฺขิโน สพฺพทุกฺขํ ปหายฯ

๓๔๘. มุญฺจ ปุเร มุญฺจ ปจฺฉโต, มชฺเฌ มุญฺจ ภวสฺส ปารคู;

       สพฺพตฺถ วิมุตฺตมานโส, น ปุน ชาติชรํ อุเปหิสิฯ

๓๔๙. วิตกฺกมถิตสฺส ชนฺตุโน, ติพฺพราคสฺส สุภานุปสฺสิโน;

       ภิยฺโย ตณฺหา ปวฑฺฒติ, เอส โข ทฬฺหํ กโรติ พนฺธนํฯ

๓๕๐. วิตกฺกูปสเม จ โย รโต, อสุภํ ภาวยตี สทา สโต;

       เอส โข วฺยนฺติ กาหติ, เอส เฉจฺฉติ มารพนฺธนํฯ

๓๕๑. นิฏฺฐงฺคโต อสนฺตาสี, วีตตณฺโห อนงฺคโณ;

       อจฺฉินฺทิ ภวสลฺลานิ, อนฺติโมยํ สมุสฺสโยฯ

๓๕๒. วีตตณฺโห อนาทาโน, นิรุตฺติปทโกวิโท;

       อกฺขรานํ สนฺนิปาตํ, ชญฺญา ปุพฺพปรานิ จ;

       ส เว อนฺติมสารีโร, มหาปญฺโญ มหาปุริโสติ วุจฺจติฯ

๓๕๓. สพฺพาภิภู สพฺพวิทูหมสฺมิ, สพฺเพสุ ธมฺเมสุ อนูปลิตฺโต;

       สพฺพญฺชโห ตณฺหกฺขเย วิมุตฺโต, สยํ อภิญฺญาย กมุทฺทิเสยฺยํฯ

๓๕๔. สพฺพทานํ ธมฺมทานํ ชินาติ, สพฺพํ รสํ ธมฺมรโส ชินาติ;

       สพฺพํ รตึ ธมฺมรตี ชินาติ, ตณฺหกฺขโย สพฺพทุกฺขํ ชินาติฯ

๓๕๕. หนนฺติ โภคา ทุมฺเมธํ, โน เจ ปารคเวสิโน;

      โภคตณฺหาย ทุมฺเมโธ, หนฺติ อญฺเญว อตฺตนํฯ

๓๕๖. ติณโทสานิ เขตฺตานิ, ราคโทสา อยํ ปชา;

       ตสฺมา หิ วีตราเคสุ, ทินฺนํ โหติ มหปฺผลํฯ

๓๕๗. ติณโทสานิ เขตฺตานิ, โทสโทสา อยํ ปชา;

       ตสฺมา หิ วีตโทเสสุ, ทินฺนํ โหติ มหปฺผลํฯ

๓๕๘. ติณโทสานิ เขตฺตานิ, โมหโทสา อยํ ปชา;

      ตสฺมา หิ วีตโมเหสุ, ทินฺนํ โหติ มหปฺผลํฯ

๓๕๙. ติณโทสานิ เขตฺตานิ, อิจฺฉาโทสา อยํ ปชา;

       ตสฺมา หิ วิคติจฺเฉสุ, ทินฺนํ โหติ มหปฺผลํฯ

      ติณโทสานิ เขตฺตานิ, ตณฺหาโทสา อยํ ปชา;

      ตสฺมา หิ วีตตณฺเหสุ, ทินฺนํ โหติ มหปฺผลํฯ

      ตณฺหาวคฺโค จตุวีสติโม นิฏฺฐิโตฯ

CR: https://supatra89.files.wordpress.com/