ธมฺมปทคาถา (๒๕) ภิกฺขุวคฺโค

      ธมฺมปทคาถาย ปญฺจวีสติโม ภิกฺขุวคฺโค

๓๖๐. จกฺขุนา สํวโร สาธุ, สาธุ โสเตน สํวโร;

         ฆาเนน สํวโร สาธุ, สาธุ ชิวฺหาย สํวโรฯ

๓๖๑. กาเยน สํวโร สาธุ, สาธุ วาจาย สํวโร;

        มนสา สํวโร สาธุ, สาธุ สพฺพตฺถ สํวโร;

        สพฺพตฺถ สํวุโต ภิกฺขุ, สพฺพทุกฺขา ปมุจฺจติฯ

๓๖๒. หตฺถสญฺญโต ปาทสญฺญโต, วาจาย สญฺญโต สญฺญตตฺตโม;

        อชฺฌตฺตรโต สมาหิโต, เอโก สนฺตุสิโต ตมาหุ ภิกฺขุฯ

        (หตฺถสํยโต ปาทสํยโต, วาจาสํยโต สํยตุตฺตโม;

         อชฺชตฺตรโต สมาหิโต, เอโก สนฺตุสิโต ตมาหุ ภิกฺขุํฯ : ฉัฏฐสังคายนา)

๓๖๓. โย มุขสญฺญโต ภิกฺขุ, มนฺตภาณี อนุทฺธโต;

         อตฺถํ ธมฺมญฺจ ทีเปติ, มธุรํ ตสฺส ภาสิตํฯ

๓๖๔. ธมฺมาราโม ธมฺมรโต, ธมฺมํ อนุวิจินฺตยํ;

        ธมฺมํ อนุสฺสรํ ภิกฺขุ, สทฺธมฺมา น ปริหายติฯ

๓๖๕. สลาภํ นาติมญฺเญยฺย, นาญฺเญสํ ปิหยญฺจเร;

        อญฺเญสํ ปิหยํ ภิกฺขุ, สมาธึ นาธิคจฺฉติฯ

๓๖๖. อปฺปลาโภปิ เจ ภิกฺขุ, สลาภํ นาติมญฺญติ;

       ตํ เว เทวา ปสํสนฺติ, สุทฺธาชีวึ อตนฺทิตํฯ

๓๖๗. สพฺพโส นามรูปสฺมึ, ยสฺส นตฺถิ มมายิตํ;

         อสตา จ น โสจติ, ส เว ภิกฺขูติ วุจฺจติฯ

๓๖๘. เมตฺตาวิหารี โย ภิกฺขุ, ปสนฺโน พุทฺธสาสเน;

        อธิคจฺเฉ ปทํ สนฺตํ, สงฺขารูปสมํ สุขํฯ

๓๖๙. สิญฺจ ภิกฺขุ อิมํ นาวํ, สิตฺตา เต ลหุเมสฺสติ;

        เฉตฺวา ราคญฺจ โทสญฺจ, ตโต นิพฺพานเมหิสิฯ

๓๗๐. ปญฺจ ฉินฺเท ปญฺจ ชเห, ปญฺจ อุตฺตริ ภาวเย;

        ปญฺจสงฺคาติโค ภิกฺขุ, โอฆติณฺโณติ วุจฺจติฯ

๓๗๑. ฌาย ภิกฺขุ มา จ ปมาโท, มา เต กามคุเณ ภมสฺสุ จิตฺตํ;

         มา โลหคุฬํ คิลี ปมตฺโต, มา กนฺทิ ทุกฺขมิทนฺติ ฑยฺหมาโนฯ

๓๗๒. นตฺถิ ฌานํ อปญฺญสฺส, ปญฺญา นตฺถิ อฌายโต;

         ยมฺหิ ฌานญฺจ ปญฺญา จ, ส เว นิพฺพานสนฺติเกฯ

๓๗๓. สุญฺญาคารํ ปวิฏฺฐสฺส, สนฺตจิตฺตสฺส ภิกฺขุโน;

         อมานุสี รตี โหติ, สมฺมา ธมฺมํ วิปสฺสโตฯ

๓๗๔. ยโต ยโต สมฺมสติ, ขนฺธานํ อุทยพฺพยํ;

         ลภตี ปีติปาโมชฺชํ, อมตํ ตํ วิชานตํฯ

๓๗๕. ตตฺรายมาทิ ภวติ, อิธ ปญฺญสฺส ภิกฺขุโน;

         อินฺทฺริยคุตฺติ สนฺตุฏฺฐี, ปาติโมกฺเข จ สํวโรฯ

๓๗๖. มิตฺเต ภชสฺสุ กลฺยาเณ, สุทฺธาชีเว อตนฺทิเต;

        ปฏิสนฺถารวุตฺตฺยสฺส, อาจารกุสโล สิยา;

        ตโต ปาโมชฺชพหุโล, ทุกฺขสฺสนฺตํ กริสฺสติฯ

๓๗๗. วสฺสิกา วิย ปุปฺผานิ, มทฺทวานิ ปมุญฺจติ;

         เอวํ ราคญฺจ โทสญฺจ, วิปฺปมุญฺเจถ ภิกฺขโวฯ

๓๗๘. สนฺตกาโย สนฺตวาโจ, สนฺตมโน สุสมาหิโต;

        วนฺตโลกามิโส ภิกฺขุ, อุปสนฺโตติ วุจฺจติฯ

๓๗๙. อตฺตนา โจทยตฺตานํ, ปฏิมํเสตมตฺตนา;

        โส อตฺตคุตฺโต สติมา, สุขํ ภิกฺขุ วิหาหิสิฯ

๓๘๐. อตฺตา หิ อตฺตโน นาโถ, อตฺตา หิ อตฺตโน คติ;

        ตสฺมา สญฺญม อตฺตานํ, อสฺสํ ภทฺรํว วาณิโชฯ

๓๘๑. ปาโมชฺชพหุโล ภิกฺขุ, ปสนฺโน พุทฺธสาสเน;

        อธิคจฺเฉ ปทํ สนฺตํ, สงฺขารูปสมํ สุขํฯ

๓๘๒. โย หเว ทหโร ภิกฺขุ, ยุญฺชติ พุทฺธสาสเน;

        โส อิมํ โลกํ ปภาเสติ, อพฺภา มุตฺโตว จนฺทิมาฯ

       ภิกฺขุวคฺโค ปญฺจวีสติโม นิฏฺฐิโตฯ

CR: http://www.lotus.rmutt.ac.th/