ธมฺมปทคาถา (๒๖) พฺราหฺมณวคฺโค

ธมฺมปทคาถาย ฉพฺพีสติโม พฺราหฺมณวคฺโค

๓๘๓. ฉินฺท โสตํ ปรกฺกมฺม, กาเม ปนูท พฺราหฺมณ;

      สงฺขารานํ ขยํ ญตฺวา, อกตญฺญูสิ พฺราหฺมณฯ

๓๘๔. ยทา ทฺวเยสุ ธมฺเมสุ, ปารคู โหติ พฺราหฺมโณ;

      อถสฺส สพฺเพ สํโยคา, อตฺถํ คจฺฉนฺติ ชานโตฯ

๓๘๕. ยสฺส ปารํ อปารํ วา, ปาราปารํ น วิชฺชติ;

      วีตทฺทรํ วิสญฺญุตฺตํ, ตมหํ พฺรูมิ พฺราหฺมณํฯ

๓๘๖. ฌายึ วิรชมาสีนํ, กตกิจฺจํ อนาสวํ;

       อุตฺตมตฺถํ อนุปฺปตฺตํ, ตมหํ พฺรูมิ พฺราหฺมณํฯ

๓๘๗. ทิวา ตปติ อาทิจฺโจ, รตฺติมาภาติ จนฺทิมา;

       สนฺนทฺโธ ขตฺติโย ตปติ, ฌายี ตปติ พฺราหฺมโณ;

       อถ สพฺพมโหรตฺตึ, พุทฺโธ ตปติ เตชสาฯ

๓๘๘. พาหิตปาโป หิ พฺราหฺมโณ, สมจริยา สมโณติ วุจฺจติ;

       ปพฺพาชยมตฺตโน มลํ, ตสฺมา ปพฺพชิโตติ วุจฺจติฯ

๓๘๙. น พฺราหฺมณสฺส ปหเรยฺย, นาสฺส มุญฺเจถ พฺราหฺมโณ;

       ธิ พฺราหฺมณสฺส หนฺตารํ, ตโต ธิ ยสฺส มุญฺจติฯ

๓๙๐. น พฺราหฺมณสฺเสตทกิญฺจิ เสยฺโย, ยทา นิเสโธ มนโส ปิเยหิ;

       ยโต ยโต หึสมโน นิวตฺตติ, ตโต ตโต สมฺมติเมว ทุกฺขํฯ

๓๙๑. ยสฺส กาเยน วาจาย, มนสา นตฺถิ ทุกฺกตํ;

      สํวุตํ ตีหิ ฐาเนหิ, ตมหํ พฺรูมิ พฺราหฺมณํฯ

๓๙๒. ยมฺหา ธมฺมํ วิชาเนยฺย, สมฺมาสมฺพุทฺธเทสิตํ;

      สกฺกจฺจํ นํ นมสฺเสยฺย, อคฺคิหุตฺตํว พฺราหฺมโณฯ

๓๙๓. น ชฏาหิ น โคตุเตน, น ชจฺจา โหติ พฺราหฺมโณ;

       ยมฺหิ สจฺจญฺจ ธมฺโม จ, โส สุจี โส จ พฺราหฺมโณฯ

๓๙๔. กินฺเต ชฏาหิ ทุมฺเมธ, กินฺเต อชินสาฏิยา;

       อพฺภนฺตรนฺเต คหณํ, พาหิรํ ปริมชฺชสิฯ

๓๙๕. ปํสุกูลธรํ ชนฺตุํ, กิสํ ธมนิสนฺถตํ;

      เอกํ วนสฺมึ ฌายนฺตํ, ตมหํ พฺรูมิ พฺราหฺมณํฯ

๓๙๖. น จาหํ พฺราหฺมณํ พฺรูมิ, โยนิชํ มตฺติสมฺภวํ;

      โภวาที นาม โส โหติ, ส เว โหติ สกิญฺจโน,

      อกิญฺจนํ อนาทานํ, ตมหํ พฺรูมิ พฺราหฺมณํฯ

๓๙๗. สพฺพสํโยชนํ เฉตฺวา,โย เว น ปริตสฺสติ;

       สงฺคาติคํ วิสํยุตฺตํ, ตมหํ พฺรูมิ พฺราหฺมณํฯ

๓๙๘. เฉตฺวา นทฺธึ วรตฺตญฺจ, สนฺทานํ สหนุกฺกมํ;

       อุกฺขิตฺตปลิฆํ พุทฺธํ, ตมหํ พฺรูมิ พฺราหฺมณํฯ

๓๙๙. อกฺโกสํ วธพนฺธญฺจ, อทุฏฺโฐ โย ติติกฺขติ;

       ขนฺตีพลํ พลาณีกํ, ตมหํ พฺรูมิ พฺราหฺมณํฯ

๔๐๐. อกฺโกธนํ วตวนฺตํ, สีลวนฺตํ อนุสฺสทํ;

      ทนฺตํ อนฺติมสารีรํ, ตมหํ พฺรูมิ พฺราหฺมณํฯ

๔๐๑. วาริ โปกฺขรปตฺเตว, อารคฺเคริว สาสโป;

      โย น ลิมฺปติ กาเมสุ, ตมหํ พฺรูมิ พฺราหฺมณํฯ

๔๐๒. โย ทุกฺขสฺส ปชานาติ, อิเธว ขยมตฺตโน;

       ปนฺนภารํ วิสญฺญุตฺตํ, ตมหํ พฺรูมิ พฺราหฺมณํฯ

๔๐๓. คมฺภีรปญฺญํ เมธาวึ, มคฺคามคฺคสฺส โกวิทํ;

       อุตฺตมตฺถํ อนุปฺปตฺตํ, ตมหํ พฺรูมิ พฺราหฺมณํฯ

๔๐๔. อสํสฏฺฐํ คหฏฺเฐหิ, อนาคาเรหิ จูภยํ;

              อโนกสารึ อปฺปิจฺฉํ, ตมหํ พฺรูมิ พฺราหฺมณํฯ

๔๐๕. นิธาย ทณฺฑํ ภูเตสุ, ตเสสุ ถาวเรสุ จ;

            โย น หนฺติ น ฆาเตติ, ตมหํ พฺรูมิ พฺราหฺมณํฯ

๔๐๖. อวิรุทฺธํ วิรุทฺเธสุ, อตฺตทณฺเฑสุ นิพฺพุตํ;

             สาทาเนสุ อนาทานํ, ตมหํ พฺรูมิ พฺราหฺมณํฯ

๔๐๗. ยสฺส ราโค จ โทโส จ, มาโน มกฺโข จ ปาติโต;

       สาสโปริว อารคฺคา, ตมหํ พฺรูมิ พฺราหฺมณํฯ

๔๐๘. อกกฺกสํ วิญฺญาปนึ, คิรํ สจฺจํ อุทีรเย;

      ยาย นาภิสเช กญฺจิ, ตมหํ พฺรูมิ พฺราหฺมณํฯ

๔๐๙. โยธ ทีฆํ วา รสฺสํ วา, อณุํ ถูลํ สุภาสุภํ;

       โลเก อทินฺนํ นาทิยติ, ตมหํ พฺรูมิ พฺราหฺมณํฯ

๔๑๐. อาสา ยสฺส น วิชฺชนฺติ, อสฺมึ โลเก ปรมฺหิ จ;

      นิราสยํ วิสํยุตฺตํ, ตมหํ พฺรูมิ พฺราหฺมณํฯ

๔๑๑. ยสฺสาลยา น วิชฺชนฺติ, อญฺญาย อกถงฺกถี;

      อมโตคธํ อนุปฺปตฺตํ, ตมหํ พฺรูมิ พฺราหฺมณํฯ

๔๑๒. โยธ ปุญฺญญฺจ ปาปญฺจ, อุโภ สงฺคํ อุปจฺจคา;

       อโสกํ วิรชํ สุทฺธํ, ตมหํ พฺรูมิ พฺราหฺมณํฯ

๔๑๓. จนฺทํว วิมลํ สุทฺธํ, วิปฺปสนฺนมนาวิลํ;

       นนฺทิภวปริกฺขีณํ, ตมหํ พฺรูมิ พฺราหฺมณํฯ

๔๑๔. โย อิมํ ปลิปถํ ทุคฺคํ, สํสารํ โมหมจฺจคา;

       ติณฺโณ ปารคโต ฌายี, อเนโช อกถงฺกถี;

      อนุปาทาย นิพฺพุโต, ตมหํ พฺรูมิ พฺราหฺมณํฯ

๔๑๕. โยธ กาเม ปหนฺตฺวาน, อนาคาโร ปริพฺพเช;

       กามภวปริกฺขีณํ, ตมหํ พฺรูมิ พฺราหฺมณํฯ

๔๑๖. โยธ ตณฺหํ ปหนฺตฺวาน, อนาคาโร ปริพฺพเช

       ตณฺหาภวปริกฺขีณํ, ตมหํ พฺรูมิ พฺราหฺมณํฯ

๔๑๗. หิตฺวา มานุสกํ โยคํ, ทิพฺพํ โยคํ อุปจฺจคา;

       สพฺพโยควิสํยุตฺตํ, ตมหํ พฺรูมิ พฺราหฺมณํฯ

๔๑๘. หิตฺวา รติญฺจ อรติญฺจ, สีติภูตํ นิรูปธึ;

       สพฺพโลกาภิภุํ วีรํ, ตมหํ พฺรูมิ พฺราหฺมณํฯ

๔๑๙. จุตึ โย เวทิ สตฺตานํ, อุปปตฺติญฺจ สพฺพโส;

       อสตฺตํ สุคตํ พุทฺธํ, ตมหํ พฺรูมิ พฺราหฺมณํฯ

๔๒๐. ยสฺส คตึ น ชานนฺติ, เทวา คนฺธพฺพมานุสา;

       ขีณาสวํ อรหนฺตํ, ตมหํ พฺรูมิ พฺราหฺมณํฯ

๔๒๑. ยสฺส ปุเร จ ปจฺฉา จ, มชฺเฌ จ นตฺถิ กิญฺจนํ;

       อกิญฺจนํ อนาทานํ, ตมหํ พฺรูมิ พฺราหฺมณํฯ

๔๒๒. อุสภํ ปวรํ วีรํ, มเหสึ วิชิตาวินํ;

       อเนชํ นฺหาตกํ พุทฺธํ, ตมหํ พฺรูมิ พฺราหฺมณํฯ

๔๒๓. ปุพฺเพนิวาสํ โย เวทิ, สคฺคาปายญฺจ ปสฺสติ;

       อโถ ชาติกฺขยํ ปตฺโต, อภิญฺญา โวสิโต มุนิ;

       สพฺพโวสิตโวสานํ, ตมหํ พฺรูมิ พฺราหฺมณํฯ

       พฺราหฺมณวคฺโค ฉพฺพีสติโม นิฏฺฐิโตฯ

 

CR: https://www.seerosensorten.de/